شانلي ميللتيمه...

(( 1 ))

يانار داغا گؤز تيكيب دير ، ياشيل باغ

بير ميللتين سون اومودو ، يانار داغ

توركمنين چايينا يان باخيردي

اودلاييردي گلستاني ، يانار داغ...

(( 2 ))

كيم بيلير كي ، هانسي گوج گونش اؤلكه سينده ، داغدا آچان گوله سئوگي يئتيشديرير ، اومود سپير ، كي بو قارانليق لار ايچينده يئنه ده كوسمور بو اؤلكه نين اؤكسوز اينسانلارينا ، يئتيم قيز اوغلان لارينا. هله بيرده باشيني اوجا توتور ، اينجه بئلين بورور ، گرير كؤكسون ، كي باخين ، قارانليغين اؤنونده ده دايانيلير.

اونون داورانيشينا قارشي ، قارانليق دان بيري چيخير ، ساغا – سولا بونو آيدير :

" داغ گولونون عؤمرو آزدير ، گونش اونا بئله ياردير ، اوزون يولدا تك قوياندير ، بيردن باتير، قارانليغا مئيدان وئرير."

بو سؤزلره ، اؤكسوز اينسانلار اينانير ، گونش باتير ، گول سارالير ، داغ باغيرير ، آلوو ساچير.

بوتون بونلار ، ايللر اؤنجه دن دئييله ن بير اؤيكويو يادا سالير...

(( 3 ))

ائل اوزاني ، ديرناقلاري ديللري

اودا چكير اوره كلري تئللري

قان آخيري اوره ييندن ديرناغا

بيلمه م نئجه سسله نديرير تئللري...

(( 4 ))

كيم بيلير كي ، او اوزان عؤمرونون قاچ باهاريني او داغين اته يينده توكه تدي ، داغ گولونو گؤرمه يينجه ، داغ باشينا گؤز تيكديردي ، كي نه اولا؟ ، يا گون چيخا ، گول اويانا ، يا داغ پاتلايا – چاتلايا ، آلوو ساچا ، اوزان قالخا ، اؤكسوز اينسانلارا وارا ، بو گؤزل خبري آپارا ، قسمت اولا ، اوجاغي سؤنموش آنانين قاپيسيني بيري چالا ، بير دمه ت چيچك الينده ، بويور دئيه ، آصلان آنا.

هردن دومانليق اولونجا ، يازيق اوزان اومودلنير ، يوخ اولونجا ، كدرلنير ، سينيق سازين قوجاقلايير ، سيزيلدايير:

- نييه اومودومو كسيرسن ، نييه؟؟؟...

(( 5 ))

كيم بيلير كي ، اونلارين گوناهي نه يدي .

من بيله لي ، بير گون بير نئچه قيز – اوغلان توپلانميشلار ، اوزون – اوزون دوشونموشلر ، تاشينميشلار ، قارانليق دان اوسانميشلار ، ساغا – سولا بير باخميشلار ، كيمسه يوخ كي ، داغين باغرين سؤكوب چيخان سودان مدد ديله ميشلر ، سو اونلارا هاي وئرينجه ، اونلاردا آند ايچميش سووا ، " سو آند ".

قارا گوجلر اولانلاري ائشيدينجه ، ال – آياغا دوشموشلر ، هاميسيني توتوقلاييب ، سوسوزلوقدان اؤلدورموشلر. سوچلاري ايسه " سوگند " دئيه بير شئ ايدي...

(( 6 ))

كيم بيلير كي ، آرادان نئچه ايل كئچدي ، اوزان آرزيسينا چاتدي ، گون اولدوزو يولا دوشدو ، آيين يانيندا داياندي ، داغين دا صبري توكه ندي ، داغ كوكره دي ، اؤكسوزلري اويانديردي ، هر تؤكولن سوچسوز قانا ، قان ديله دي...

يازان : رسول ملك زاده

***

« قیزینی دؤومه ین ، دیزینی دؤوه ر!...»

***

سون گونلرده منیم یازیلاریم اؤلکه ده ساغیر قولاقلارا یئتیشمیش ، بعضی لری به یه نمه میش اونلاردان بعضی لری تهدید یاغدیرمایا باشلامیش ، نه ایمیش  ، هرکس قیسمتی قدر یاشارمیش ، بو یازیلانلار یانلیش.

نه دئمک قیسمتی بو قدرمیش ، اصلینده دوزه ن یانلیش ، آما بونو آنلایان یوخ موش...

بو آرادا ساققاللی آغا دا آرایا گیرمیش ، بویور ائتمیش:

- اسکی دن ده بئله کوفورلری یازانلار وارمیش ، آنجاق مؤمون لرین همتی له هامیسی بو اؤلکه دن سورون موش.

سونوندا بو ایشلره قاتیلانلار ، قوتسال بیر بیرلیکه سؤز وئرمیش...

***

آخشام اوستو شیشمان ، بوگونکو آل – وئرلرینین حئساب – کیتابینی گئده رکن ، قادینین خیال قوشو بام – باشقا یئرلرده اوچوردو ، بلکی ده اونوتماق ایسته ییردی ، اؤزونون ده بئله بیر آل – وئرلرین قوربانی اولدوغونو ، آتاسینین شیشمان لا آل – وئری سونوجو بو ائوه آیاق باسدیغینی...

دوشونوردو آما دوشونمک اونون اوچون ، سئویشمک دن یورولان شیشمانین خورولتو سسی له ، گؤزلرینی زیلله مک دیر گؤیه ، گؤی ده نه گؤی ، قارا دیره کلرله باسدیریلمیش بیر تاوان ، گئری قالان هر شئ یالان...

او زامانلار سئودا نه دیر دئیه سوروش سایدین ، قونشو قیزینین بیر اوغلان لا یوخاری کنده قاچماسینی دوشونه ردی ، ساده جه. سونرا ایکی کندین بیر – بیرینین جانینا دوشوب ، بؤیوک قان داعواسی. بیرده آتاسینی خاطیرلاییردی کی او زامانلار قونشو ائوینده کی ییغینجاق لارین ان باشدا اوتوران لاردان بیری ایدی ، و باشینی یئره دیکمیش قونشونو هده له ینلردن بیری. کی سنین قیزین بو کندین آبریسی له اویناییب ، اؤز الین له بو ایشی تمیزله ، دئیه. ایت هوره ر ، کروان کئچه ر. قونشو بو سؤزلری بوش وئره بیله ردی ، ندنسه کؤهنه سیلاحینی آلیب گئتدی ، و بیر نئچه گون سونرا ، کندین قبریستانیندا قونشو قیزینین قانلی گؤوده سینی یئره گؤمدولر ، و کیمسه او تعزیه ده ، " آللاه رحمت ائله سین " دئمه دی ، ساده جه قونشونو اؤیوردولر ، کیشی لیک ائتدین دئیه...

هله بو آرادا ، بیری لری چیخیب دا اؤج آلماق ایسته رلر ، و بوتون بو قارما – قاریشیق ایشلرین آراسیندا ، قونشو ائوینین یانیقلی آناسی اؤله ر ، ندنسه ، و بیر نئچه آی سونرادا قونشو ائوه یئنی بیر خانیم بویور ائده ر ، نه گؤزه ل سئودالاردیر بونلار...

آردی وار...

یازان : رسول ملک زاده

« سانكي زامان دايانيب دير ، بو خارابادا...»

***

او ، نفس چكير هله ده ،

دؤزوم لودور درد كدره

نييه يازيق هده له نه؟

قارغيش اولسون بو سنته!

***

اصلينده هئچ ده دئيينگن دئييل دي بو قادين. حتي گؤي لر ائشيتمه سين دئيه ، ساده جه بير آه چكردي ، كدرلي آنلاردا. چونكو قورخاردي ، تانري نين غضبيندن ، شيشمانين كؤته ييندن!

دوغروسو هئچ ده يونگول دئييل دي شيشمانين الي. قادين داديب دير ، اونونچون اونون آغيرليغين بيلمه لي. نه ائتمه لي ، سؤز ائشيتمه لي ، ساده جه دؤزمه لي. ايلك گوندن دونيا بئله دؤنمه لي.

هر آن سيخيشديريردي اونو ، سانكي بوغازينا دولاشميش بير سيجيم ، قارالديردي ياشاميني ، همده نه بيچيم!

هر آن سينديريردي غرورونو ، آغزين آچيب دانيشماق ايسته ييردي آنجاق يانينداكي ديشله ييردي ديلينين اوجونو ، و باشلامادان يئنيليردي...

اوندان دير كي ، بو اؤلكه ده بوتون آجي سؤزلر اوره كلره قالانار ، قبيرلره ياتار ، بعضي لري اوردا اويانار ، اود توتار يانار ، ديشاري يا داشار ، او اوزده ن دير كي ، بعضي شيطان پارچالارينين قبيرلرينه ياخينلاشماق اولماز ، چونكو اوره ك يارالاري قبيرده ده ساغالماز...

شيشمان قالخير ، نه تانري يا شوكور قيلير ، نه قادينا ، بو ، تاريخين اونا وئردي يي اوستونلوك دور...

آردي وار...

«رسول ملك زاده»

سحر گؤزومو آچدیغیمدا ایلک گؤردویوم ، ساغیمدا آتامین جان سیز گؤوده سی ایدی. بیر ده سولومدا چیپلاق بیر قادین ، لیلا.

آتامین باخیجی سی دیر بو لیلا. دون آخشام آراییب آغلایا – آغلایا آتامین اؤلوم خبرینی وئردی. یالان دان آغلی ییردی ، اصلینده اوره یینده اوجادان گولدوغونو ائشیدیردیم. سحر گله رم ، دئدیم :

- اولماز ، من قورخورام.

ندنسه دوردوم گئتدیم. یئنی آچدیغیم ودکا دا منله گلیردی. یولدا ایچیب قورتارمیشدیم. آما بوش شوشه سی هله ده الیمده ایدی. لیلا قاپی نی آچان کیمی گؤزلرینی الیمده کی بوش شوشه یه تیکدی. منسه دانیشمادان ایچه ری گیردیم. لیلا بیر شئ لر آنلاتیردی آتامین اؤلومو ایله ایلگیلی آنجاق چوخ چکمه دی کی او سؤزلره هئچ فیکیر وئرمه دی ییمی آنلادی.

آتامی گؤرمک ایسته دی ییمی سوروشدو ، " یوخ " دئدیم.

قارشیمدا اوتوروب ، گؤزلرینی گؤزلریمه تیکمیشدی لیلا. یاواش – یاواش باخیشی ده ییشدی ، بیر ایل بوندان اؤنجه کی کیمی اولموشدو. بیر ایل اؤنجه آتام بیر هفته مشهده گئتدی . لیلا ایسه او بیر هفته ده مین بیر یوللا منی ائوه چکیب گئجه نی اوردا قالمامی ایسته ییردی. نه ده اولسا من آتامدان داها گنج ایدیم!

آما دیلک لری بوشا گئتدی.

و بو گئجه ، ایکی اتاقلیق بیر ائوین بیر اتاغیندا بیر اؤلو یاتمیشدی. و یانلیز بیر اتاق قالیردی دیری لره. اویونا ائرکن باشلامیشدی ، باخیشی ایله ، یئریشی ایله ، اوتوروشو ایله. داها ائروتیک گؤرونمک اوچون نه باشاردی ایسه یاپدی.

قالخیب آتامین اتاغینا گئتدیم. اوزونه دک اؤرتموشدو. بیر گوشه ده اوتوروب یارین نه ایشلر گؤره جه ییمی دوشوندوم ، یا دا بو گؤوده نی هارا گؤمه جه ییمی. اتاغین هاواسی اؤلموشدو. لیلادان بیر سس یوخ ایدی. یاتدیغینی دوشونوب سئویندیم. آما بیردن قاپی آچیلدی ، قورخمادان ، چکینمه دن ، اؤلونو کنارا چکیب ، یاتاغیندا یاتدی ، منیمله...

                                                                    آردی وار...

(رسول ملک زاده)

 بيلميرم يئر كوره سينين هانسي ديب بوجاغيندا ، هانسي ديني تؤره نده ، سسله نيردي جماعته ، قادين شيطان پارچاسيدير دئيه ، ساققاللي آغا.

نه دئميشلر ، سورو دالي قاييتسا ، آريق آخسار قاباغا دوشه ر!

حالبوكي همين جماعت هاوا قارالينجا او شيطان پارچالاريندان دويموردولار ، سانكي گئجه لر شيطان ، تانري يا چئوريليردي!...

***

... سونرا راحات بير نفس آليب پالتارلاريني گئيدي. بو قاپ – قارانليق گئجه ده ، بوندان آرتيق گؤرولمك ايسته ميردي ، يانيندا ياتان قادينين طرفينده ن. پالتارلي ياتان شيشمان تانيديق بيريسي ايدي ، او معلوم دين تؤره نينده ، اؤنده اگله شنلردن بيريسي ايدي. گئجه ياري يي كئچميشدي ، قادين ديلدن دوشموشدو ، آنجاق شيشمان سو ايسته يينجه ، يينه ده درحال آياغا قالخيب يئرينه گتيرمه سيني ده اونوتمادي. شيشمان سويو قانتاريب سونرا ياتدي ، قادين گؤيده كي اولدوزلارا بير داها باخدي ، اوزاق دوشه ن رؤيالارين دوشونوركن ، گؤز ياشلاري يينه آخدي ، سانكي گؤز گيله لرينه اولدوز تاخدي ، بو كدر دولو آنلارا ائشليك ائتدي ، شيشمانين خورولتو سسي. اتاغي باشينا آلميشدي.

سونوندا گون دوغور ، شيشمان اسنه يه – اسنه يه قالخير ، يينه هر شئ اونا حاضير ، سانكي قولاق لاري ساغير ، اونون هر اداسي بو ائوده بيرينين اوره يين قازير.

ائوي سس سيزليك بورويوب ، ساده جه شيشمانين يئمك يئمه سسي ، چايي خورولداتماسي ، اوجادان گه ييرمه سي ، ايسكاني نعلبكي يه چيرپماسي ، يعني چاي گتير ، تئز گتير!

ثانيه لر آخديقجا ، يئني توزاقلار قورولور ، شيشمان يينه بويورور ، قادين نفس آلديقجا.

گله نك دووارلاري آلتيندا ازيلميش بير قادين دير بو قادين ، او دووارلارا ميخ لانميش ساعاتلارين هر ثانيه سي اونا توزاق ، نييه بيز ده او دووارلارداكي ساعاتلارا بير ميخ ووراق ، نييه؟

زامان اونون اسارتي له گئدير ، او اسارته گوج وئرير ، دستك وئرير. بو آرادا شيشمان دويمور ، يينه ايستير ، نه لر ايستير...

شيشمان قالخير ، نه تانري يا شوكور قيلير ، نه قادينا ، بو ، تاريخين اونا وئردي يي اوستونلوك دور...

آردي وار...

يازان : رسول ملك زاده