حانسی کؤر؛

        منیم کیمی،

             گؤردوکلرییله

                  گؤژلرین اویدو؟!

حانسی کار؛

         منیم کیمی،

             ائشیتدیکلرین

                    میخلادی قولاغینا؟!

حانسی معتاد؛

           منیم کیمی،

                  چکدییی نفسله

                         جییرین سؤکدو؟!

حانسی انگل؛

           منیم کیمی،

              سوموردو بارماقلاریندان

                                      اؤز قانین؟!

حانسی یئر کوره سی؛

                     منیم کیمی

                          اولمادان بللی یئری

                                              گرکسیز،

                                                          زوراکی

                                                                 بیر جذبه یله یاشادی؟!

حانسی اوغلان؛

        منیم کیمی،
           بیر قیزا باخیرکن

                      ایضطیرابدان

                            سیندیریب زامانی

                                            آجیغیندان

                                                   اؤزون بوشادی؟!

حانسی  روبوت؛

            منیم کیمی،

                       عصبلرین

                          ائلئکتیریک پیریزینه تاخیب،

                                                  بئیینینی پاتلاتدی؟!

حانسی هئیکل؛

           منیم کیمی،

               اؤز باغرینی چاتلاتدی؟!

حانسی داش؛

          منیم کیمی،

               گؤزیاشلارییله یوغرولدو؟!

حانسی یالان؛

              منیم کیمی،

                      اؤز وارلیق ایله

                                 دوغرولدو؟!

حانسی یام- یام؛

             منیم کیمی،

                    اتین قانینا

                         تیلته ائتدی؟!

و حانسی شاعیر؛

              منیم کیمی،

                     سؤزلرین قوسدو؟!

شئعیر: خسرو صلح کننده(باریشان)

جومعه:28/2/1386

ایصفهان(شهر اوتوبوسوندا«خط واحد»)، سربازلیق.

***

« قیزینی دؤومه ین ، دیزینی دؤوه ر!...»

***

سون گونلرده منیم یازیلاریم اؤلکه ده ساغیر قولاقلارا یئتیشمیش ، بعضی لری به یه نمه میش اونلاردان بعضی لری تهدید یاغدیرمایا باشلامیش ، نه ایمیش  ، هرکس قیسمتی قدر یاشارمیش ، بو یازیلانلار یانلیش.

نه دئمک قیسمتی بو قدرمیش ، اصلینده دوزه ن یانلیش ، آما بونو آنلایان یوخ موش...

بو آرادا ساققاللی آغا دا آرایا گیرمیش ، بویور ائتمیش:

- اسکی دن ده بئله کوفورلری یازانلار وارمیش ، آنجاق مؤمون لرین همتی له هامیسی بو اؤلکه دن سورون موش.

سونوندا بو ایشلره قاتیلانلار ، قوتسال بیر بیرلیکه سؤز وئرمیش...

***

آخشام اوستو شیشمان ، بوگونکو آل – وئرلرینین حئساب – کیتابینی گئده رکن ، قادینین خیال قوشو بام – باشقا یئرلرده اوچوردو ، بلکی ده اونوتماق ایسته ییردی ، اؤزونون ده بئله بیر آل – وئرلرین قوربانی اولدوغونو ، آتاسینین شیشمان لا آل – وئری سونوجو بو ائوه آیاق باسدیغینی...

دوشونوردو آما دوشونمک اونون اوچون ، سئویشمک دن یورولان شیشمانین خورولتو سسی له ، گؤزلرینی زیلله مک دیر گؤیه ، گؤی ده نه گؤی ، قارا دیره کلرله باسدیریلمیش بیر تاوان ، گئری قالان هر شئ یالان...

او زامانلار سئودا نه دیر دئیه سوروش سایدین ، قونشو قیزینین بیر اوغلان لا یوخاری کنده قاچماسینی دوشونه ردی ، ساده جه. سونرا ایکی کندین بیر – بیرینین جانینا دوشوب ، بؤیوک قان داعواسی. بیرده آتاسینی خاطیرلاییردی کی او زامانلار قونشو ائوینده کی ییغینجاق لارین ان باشدا اوتوران لاردان بیری ایدی ، و باشینی یئره دیکمیش قونشونو هده له ینلردن بیری. کی سنین قیزین بو کندین آبریسی له اویناییب ، اؤز الین له بو ایشی تمیزله ، دئیه. ایت هوره ر ، کروان کئچه ر. قونشو بو سؤزلری بوش وئره بیله ردی ، ندنسه کؤهنه سیلاحینی آلیب گئتدی ، و بیر نئچه گون سونرا ، کندین قبریستانیندا قونشو قیزینین قانلی گؤوده سینی یئره گؤمدولر ، و کیمسه او تعزیه ده ، " آللاه رحمت ائله سین " دئمه دی ، ساده جه قونشونو اؤیوردولر ، کیشی لیک ائتدین دئیه...

هله بو آرادا ، بیری لری چیخیب دا اؤج آلماق ایسته رلر ، و بوتون بو قارما – قاریشیق ایشلرین آراسیندا ، قونشو ائوینین یانیقلی آناسی اؤله ر ، ندنسه ، و بیر نئچه آی سونرادا قونشو ائوه یئنی بیر خانیم بویور ائده ر ، نه گؤزه ل سئودالاردیر بونلار...

آردی وار...

یازان : رسول ملک زاده