یئریییردیم خییاواندا،

هر آچیدا

     یئرییردین سن ده.

چیچکلرده آچدین حئی،

دیریلدین جانلیلاردا،

بزندین قادینلاردا،

ماشینلاردا سسلندین،

سؤزلرده حایلاندین.

بیردن بیره؛

     یاغدی یاغیش.

دؤزنمه دیم،

     آخدیم دای!

آمما...

 سنی یاغیشلاردا آپارمادی.

شعر:خسرو صلح کننده«باریشان»

1384/1/22

قایناق:ارک روزنامه سی

یایلاق هاواسی دیر.

دوشلریم کوچمک ایسته ییر.

بوخاری توستوسو بوغورایناملاریمی.

بورو قاراسی دولوب گؤزلریمه.

یاری گئجه سسینین قارانلیغینی ایسته ییر.

کردیلرایچینده سوسریلر دک ایشیلداسین.

دایانسام من ده بورو دک یویولاجاغام قنووا!

پاریلداییر قارلار.

آلدادیر قالماغا.

یئرده قارلا توپراغین قوجاقلاشماسی منی تلسدیریر.

بوخچا می ییغمالییام؟

یوخسا قارکیمی قوجاقلاناجاغام می؟

اؤنومده باهار یاشاییر.

باهارا ساری  گلن وار.

قیشدان گلنلر، گوزتچی ایسته ییر.

لیدا نهری

گونده لیک اولوب شئعیرلریم

تیراژی دا بیر دانا

اوخومایان اوخوچوما

تیترلری دارغین

دومانلی بیر رسمی ده یوخ

شکیللرینه  ده یر وئرسن باری .

کاغاذا چیخارتسایدیم

کاغاذلا سیله بیلردین

اوره ییوین کدرلرینی

آمما من ده بو شئعیردن بیری یم

گؤزله مه ییرسن اوره ییمین خبرینی .

 فریبا نهری

گولوشلو قولچاقلارا بنزه ییر گولوشوم!

تاقچادان یئره دوشسم ده؛

دوداقلاریمدان پوزولماییر .

گولدورسه نیز، گوله جه یم!

آغلاتسانیز، آغلایاجاغام!

هله بئینیمه ده اوچ- دؤرد سؤز ضبط ائده جه یم،

اللریمی ترپتسه نیز کئیفینیزی سوروشاجاغام!

اوخویان قولچاقلارا بنزه ییر سئوگی لرینیز!

کوره یینیزده کی آچاری بورسا هر گؤزل قادین؛

اوخویاجاقسینیز سئوگی ماهنی سینی!

قولچاق ساتان توکانا بنزه ییر بورا!

باطریلاریمیزی چیخارتیب ساتیچی،

هدر اولمایا باطریلاریمیز بوشونا .

 فریبا نهری

دئدیم کی بنزه مه چوخ گوللره 

                           گولوشلو ائلناز

  سولدورار باهار سنی 

                          گوللری دک

 دئدیم کی بنزه مه چوخ دامجییا 

                                   نازلی پینار

   قویلایار بولود سنی

                    یاغمور لاری دک

 دئدیم کی نازلانما چوخ سئوگییه 

                                سئومه لی ناز

 آپارار تانری سنی

                سئودیکلری دک

فریبا نهری

بوراسي تبريز

بوراسي مينلر ائو آراسي

منيم اوتاغيم

و آرخاسيندا اوتوردوغوم

بيلگي ساياريم منيم ...

بوراسي منيم اؤزگور دؤولتيم !!!

ائله بورادان يازارام

مكتوبلاريمي سنه

هر گئجه

بوتون موتورلو پوستچولاردان ،

مكتوب آپاران گؤيرچينلردن اوزاق ...

ائله بورادان يازارام

بوتون سؤزلريمي سنه

هر گئجه ...

بوراسي منيم اوتاغيم

بير آز تؤر – تؤكونتو

بير آز رمانتيك

بلكه بير آزدا

سنسيزليك له دولو !!!

هه ...

بوراسي منيم ...

اوره ييمي بعضاً

بوشالدارام بيلگي سايارين هاردينا

بعضاً ده

مكتوبلاريما جالانار اوره ييم .

گول ده گؤنده ره رم سنه هر زامان .

هه ...

بوراسي منيم اوتاغيم

بوراسي منيم چون

تبريزين گؤبه يي

بوراسي سنسيزلييي باغيرديغيم يئر

بوراسي منيم اؤزگور دؤولتيم

بوراسي ...

منيم اؤز اوتاغيم !!!...

بابك قوجا اوغلو

اللریم یاردیم ائتدی .

قاش- قاباغینی ساللادی.

اللریم بوزلادی.

یوزون چئویردی.

ایکی ال، بیر قولتوق قالدیم!

ليدا نهري

قارشی دورموشام دونیایا.

 بلکی ده من اوداجاغام.

یا من اونو قویلایاجاغام اؤزومده، یا او منی.

یا پارتلایاجاغام، یا پاتلا داجاغام.

آنجاق بئیله گئچمه یه جک.

ليدا نهري

سوزلر دیلیمدن قاچقین اولاندان

گوزلریم بویلو اولدو آنلاملارا

سانجی باخیشلاریمی اولدورور

سانکی هله دوغوم زامانی دئیل

باغیریر اوره ییم اما دئیه سانجی هله پیشمه ییب

قورخورام

دوشله ریم اولو دوغولا

******

اخیر اغریدی سانجی منی اولومه ساری اپاریر

بوغازیم کسیلیر

دوشلریم داملا داملا اولو دوغولور

 ليدا نهري

هی آرالی گزن تولکو

کوچه لر هله گولور،سن تک یولچولارا

آی کوپک وفاسینا گولن

قوی قاچ ایتلر هورور سندن قالان ایاق یئرلرینه

سانجیلانیب کوپکلر آج قاچیرلار

دیشلر ی قیلینج سل کسکیندیر ، حولقوموندان چیخان سوزلره

دوشه دیگین ناغیللار آیاغا قالخیب

 قوی قاچ بوغماغينا گلیللر

یوبانيبسان تئز اوزاقلان

چوخداندیر سن تکلر بیر آیری کوچه ده ته زه ناغیل لار دئیرلر

اوتانما باش اوجا دولان دونیا سن لردن یارانیبدیر

ليدا نهري

اوره ییم...

   گؤیلرین چیرپینیشی.

گؤزلریم...

    یاغیشلارین یادیگاری.

سؤزلریم...

    سحرین سوسغونلوغو.

آددیملاریم...

    اکیلمیشلرین تارلاسی.    

و دوروشوم...

    داغلارین آغلاییشی.   

هادی گل قورتار منی یاز هاوالیم.

شعر:خسرو صلح کننده «باریشان»

…

بیر باغ سووزودا وئریلمه دی

کوسدون مو گئت

آغلایانا داها په په یوخدو

گئدنین دالیسیجا سو سپن یوخدو

گلمیشدین دونیایا صاحاب دوراسان

اللرینن قوللاریندان اوزون گئدیر

کوسدون مو گئت

دالینجا آغلاماغا داها گوجوم یوخ

(آیسئل)