قيش گليب دیر. آنام ياتيب. اوزون زاماندير كي ياتيب . خبرسيزدير ياوروسوندان. يئل ، قارلا بيرله شيب بوتون گوجو ايله آجيماسيزجا بير زامانلار يام – ياشيل اولان آنامين ، ياعني بو شه هرين اوجا آغاجلاريندان بيريسي نين ، سون ياپراغين اؤلدورمه يه چاليشير. يئرده كي تون ، آغزين آچيب مني ايسته یير ، گؤیده كي تون ، ايشيقلانمایير ،  قاپ – قارانليق ، اولدوزلارين گيزله ديب دير ، قاش – قاباغين ساللاييب دير.

قيش گليب دير. آنام ياتيب. آرتيق سودو ده قورويوب ، آج ، يالنيز ، سوزالیب سارالميش اوشاغين ، ياپراغين ، اونودوب. گونلر كئچديكجه من داها چوخ ساراليرام ، او داها چوخ سویويور. يادلارين ديلي اوزانير ، هم آناما ، هم ده منه. اوستومه قارلار دوشور ، سون نفسيمله اريديب ، يئره ساري

گؤنده ريرم. كيمسه بو ايشه سئوينمه یير. يئنه قار ياغير.  گؤي قارالير ، يئر آغارير ، دونيا منه يان باخير ، كيمسه منيم ديره نمه ییمه دستك وئرمه ییر. يئل لر اؤزگور ، يئل لر اسير ، اسن يئل لر له اسيرم ، من ، اسيرم!

قيش گليب دير. آنام ياتيب. ياديمدادير قوجا بير ياپراق وار ايدي ، كئچن ايلين ياپراقلارين او گؤرموشدو ، او زامانلار يئني دوغموش قوجا ياپراق ، كئچن ايلين ان سيمیتن ياپراغي نين سون آنداكي سؤزلريني ائشيتميشدي ، اودا منه يئتيرميشدي ، بالا سن ده يئتير دئيه ، ياواش – ياواش پيچيلدادي:

" قيش نه قدر سويوق اولسا

آغاج آنانين يوخوسو نه قدر ده آغير اولسا

يئنه ده سيز ديرنمه يي اونوتمايين

ویجودوزدا ایه ر بير آز نفس اولسا "

بونو دئييب راحاتلادي ، سونرا قيشقيردي يئل لره ، هاراي چكدي :

" آرتيق آلين بو جانيمي..."

او دئدیکجه يئل يوگوردو ، ياپراق ، آلوولاندي ، ياندي!

قيش گليب دير. آنام ياتيب. ياغمالانيب ، يالين قاليب! كدرلرين ، قايغي لارين ساخلاييب دير منيم آنام ، ياز گلنده ياس توتاجاق ، گؤز ياشلارين آخيداجاق ، آغلاياجاق.

قيش گليب دير. آنام ياتيب. من هله ده دوشمه ميشم ، ياپراقلارا سؤز وئرميشم ، سون ياپراغين سون سؤزلرين يئني لره يئتيرمه دن ، سؤيله مه دن ، بو دونيادان گئتمه ييم يوخ ، كؤچمه ييم يوخ...

رسول ملك زاده

بوگون بیر اوشاغین دیلی آچیلدی

هؤججوله مه دن " آنا " دئدی

آنا دا " جان بالا " دئدی

لوطفا" گؤز یومون بو گوناها

لوطفا"...

موفته یاشاییریق، موفته!

هاوا موفته، بولود موفته.

دره-تپه موفته.

یاغیش، لیغ-زیغ موفته.

اوتوموبیللرین ائشییی،

             سینمالارین قاپیسی،

                           ویترینلر موفته.

پنیر-چؤرک دئییل آمما،

             آجی سو موفته.

کلله قییمتینه آزادلیق،

              اسیرلیک موفته.

موفته یاشاییریق موفته!

ترک ائتمه دی سئودان منی!

آج قالدیم...

       سوسوز قالدیم...

خایین قارانلیقدی گئجه.

جان غریب،

      جان سوسقون،

                جان پارامپارچا،

و اللریم قاندالدا،

توتونسوز، یوخوسوز قالدیم.

              ترک ائتمه دی سئودان منی!

شئعر:احمد عاریف

Uzaq;

  Bütün adətlərdən,

Uzaq;

   Bütün sünnətlərdən,

Uzaq;

    Bütün ləzzətlərdən,

Bütün qoşullardan uzaq,
                           sevəcəyəm səni mən.

⎕⎕⎕

Açmadığım zaman;

                   Gözlədiyim tilfunu,

Özümə iş

      Axtarmadığım zaman,

Al-ver edincə;

    Uduzduğum zaman,

Geçdiyim zaman;

                   Pasportsuz sərhəddən,

                                 sevəcəyəm səni mən.

Şeir:xosro solh konəndə(barışan)

1385/6/28