تبليغاتX
انجمن ادبی اسین تبریز

انجمن ادبی اسین تبریز

شعر ، نثر ، اینجه هونرلر

نه اولوم ايسته ييردي

 نه يئني ياشاييش

سادجه اوزوني

آزاد بير اينسان آرزيلاييردي

 

مهدی خدائی (ائلیار)

+ نوشته شده در  ساعت   توسط تیم مدیریت وبلاگ اسین  | 

اويرتمندن سوردوم

نيفرته سون قويما اولارمي ؟

سويله دي اولار

 سئوگي گوجيله

 

مهدي خدائي(ائليار)

+ نوشته شده در  ساعت   توسط تیم مدیریت وبلاگ اسین  | 

ياشا

سئو

گول

 بونلار اسكيك اولما سين ياشاميندا

ياشين نئچه اولورسا اولسون

هر شئيين ان گوزه لي سنينله اولسون

 

مهدي خدائي(ائليار)

+ نوشته شده در  ساعت   توسط تیم مدیریت وبلاگ اسین  | 

تقدیم به همه شهیدان انقلاب اسلامی و رهبر انقلاب حضرت امام خمینی (ره)

 

 تبریزین آخشاملاری اونون اوچون چوخ گؤزل ایدی . ائله اوشاقلیقدان بو گونه کیمی گونش باتماسینی سئویب هر دفعه اونا باخماغا ائولرینین دامینا چیخاردی . بو سون زامانلار گون باتماسینا باخماغا واختی دا چوخ ایدی . آخی بو شولوق ها شولوق دا کیم گلیب دووار قیراغیندا اوتوران بالاجا بیر اوغلاندان باشماقلارین واکس ائله مه یین ایسته یه جک ؟ حاج میر سلیم ده نئچه گون قاباق منبر باشیندا دانیشیب  جاوانلاردان ایسته میشدی کی میلته قوشولوب و تظاهراتدا شیرکت ائتسینلر .  نئچه گون ایدی کی ملتین های ـ هارایی، آمبولانس لارین اورک قیران آژیری هابئله آرا ـ سیرا آتیلان گولـله لرین نریلتی سی هامینی انقلابین باشلاماسینا ایناندیرمیشدی . چوخلاری اینانماسایدیلاردا آنجاق گونده بیر نئچه گنج اوغلانین شکیللرین دووار دا گؤرنده داها دئمه یه هئچ بیر سؤزلری قالمیردی . دوغروداندا انقلاب اؤزون هامییا ثبوت ائله ییب یئر ـ گؤیو بیر ـ بیرینه قاتیردی . آیدینین 15 یاشی اولسایدی دا آنجاق بو گونه کیمی       اؤز تای ـ توشلاری کیمی اویناماغا باش قاتمامیشدی . آتاسی آللاهین رحمتینه گئدندن ، او اؤزو ایشله ییب آناسی و باجیسین ساخلاییردی . آتاسیندان یادگار قالان یاشیل کت آیدینی او یاشیندان داهادا یوخاری گؤستریردی . هر گون سحر گجیل قاپیسیندا اؤزونه بیر یئر تاپیب ، دوزتدییی قوتونون آرخاسیندا اوتوراردی . قوتونون ایچینده نئچه دانا باشماق رنگی ، فیرچا هابئله دستمال قویموشدو . آخشاما قدر اورادان کئچن کیشی لرین و مسافرلرین باشماقلارینی واکس لاییب ایکی اوچ تومن قازانیب ائولرینه ساری یوللاناردی . بعضاً ده یولونون اوسته یوغورد ، چؤرک یادا باشقا زادلار آلیب ائوه آپاراردی .

آنجاق آیدین داها نئچه گون ایدی ایشه گئتمیردی . نئچه جاوان اوغلانلا مسجد ده بؤیوک مقوالار اوسته شعار یازیب تظاهراتا حاضیرلاییردی . بعضاً ده بیر گالن الینه آلیب  اورادان ـ بورادان بنزین ییغیب کوکتول موتولوف دوزلدیردی .

حاج میر سلیم اونا چوخ تاثیر قویموشدو . آیدین اونون سؤزلرینی چوخ سئویردی . هر گون دامدا گونون باتماسینا باخا باخا حاج میرسلیمین ده مسجدین بلندگوسوندان یایینلانان احساسلی سسینی ائشیدیب آرتیق جوشوردو . آناسی اوغلونون تظاهراتدا اولماسیندان نگران اولسایدی دا آنجاق اورییین تکینده اونا فخر ائدیردی . داها دوغروسو اؤز کیشی سینین اییینی آیدین دان آلیردی . آیدین دوغرودان دا بیر کیشی ایدی . بیر ائوی اؤزو تک باشینا دولاندیریردی . سون زامانلار باجیسینین آلتی یاشی دا بیتدی . بو آیدین اوچون هم چوخ سئوینمه لی ایدی ، همده کدرلی . سئوینمه لی بونا گؤره کی باجیسی بؤیویور ، کدرلی ده بونا گؤره کی او بو ایل مدرسه یه گئتمه لی ایدی . اونون آدینی مدرسه یه یازدیرماغا پول لازیم ایدی . آنجاق آیدین آناسی و باجیسینین یانیندا اؤزونو سیندیرماییردی . اونلارا سؤز وئرمیشدی کی هر هاردان اولموش اولسا باجیسینی بو ایل مدرسه یه یازدیراجاق . آناسی آیدین دان آرتیق نگران ایدی . ایسته ییردی قولوندا کی بیلزیکلرین ساتسین بلکه بیر پول دوزلده بیلسین . آنجاق آیدینین غیرت و غرورونون سینماق قورخوسوندان هئچ سسین چیخارتمیردی .

تبریز چوخ قاریشمیشدی . بیر یاندان انقلابچی لار ، او بیری یاندان دا شاه دان دفاع ائله ین سربازلار . هامی دیمیشدی بیر ـ بیرینه . ملت دایانمادان قاباغا گئدیردی و سربازلاردا ملتی گولـله یه باغلاییردیلار . آرادا بعضی لری بیریسینی اللرینی اوستده آمبولانس لارا ساری قاچیردیردیلار . « الله اکبر » سؤزو میلتین دیلیندن دوشموردو . بو ملت آرتیق جوشموشدو . اونو سؤندورمک اولموردو . بونو شاه دا بیلیردی، اونون نؤکرلری ده . آما اوزه قالان آداملار کیمی یالنیز دفاع ائله مه یه اوز گتیرمیشدیلر . قاباقلاریندا دورانی اؤلدوروردولر . شاه یامان تخت ـ تاجیندان نگران اولموشدو . ملت بونلاری گؤردوکجه سئوینیب داهادا گوجلنیردی . آیدین بیر آن دا ملتدن اوزاق دوشموردو . هامی اونون قورخمازلیغینا هابئله جسارتینه حئیران قالیردیلار . نئچه دفعه لر اولموشدو کی الینده بیر کوکتول موتولوف شاهین سربازلارینا ساری قاچیب اونو اونلارا ساری توللامیشدی . هئچ ندن قورخموردو . بو جسارتی اؤز آتاسیندان یادگار ساخلامیشدی . ژاندارمالار هئچ زامان آیدینی توتا بیلمه میشدیلر . ایکی دفعه ده اونون آرخاسیجا گولـله آتیب اونو یارالاماق ایسته میشدیلر کی آللاهین لطفی ایله اونا هئچ نه اولمامیشدی .

ایللر بویو مختلیف حزب لر آزادلیقدان دانیشیب های ـ کوی سالسایدیلار دا آنجاق بو گونلر سیچان یووالاریندا گیزله نیب قورخا ـ قورخا بو تظاهراتا باخیردیلار . آنجاق آیدین هئچ های ـ کوی سالیب شعار وئرمه دن جانینی الینه آلیب ملت له برابر تظاهرات لاردا شرکت ائدیردی . هر زامان حاج میر سلیمین سؤزلری قولاغیندا ایدی .  او دئییردی آللاه و ملت یولوندا چالیشان کسلر دونیانین ان سعادتلی آداملاریدیلار .

آیدین هر گوندن آرتیق هیجانلی ایدی . سحر بؤیوک بیر تظاهرات بازار آغزیندا باشلاناجاق ایدی . آخشام نامازینی مسجدده قیلیب ، حاج میر سلیمین سؤزلرینه قولاق یاتیردمیشدی . بو آخشام هر گونلر کیمی گونشین باتماسینی گؤره بیلمه میشدی . ائوه قاییداندا داها هاوا قاپ ـ قارانلیق اولموشدو . باشینا مینلرجه فیکیر گلیردی . مدرسه لرین باشلانماسینا نئچه گون دن آرتیق قالمامیشدی . آما او هله باجیسینین آدینی مدرسه یه یازدیرانمامیشدی . بیر طرف دن ده ایش یوخ ایدی . پول قازانماق اولموردو . بو گونلر آیدین و اونون عائیله سینه چوخ چتین گونلر ساییلیردی . نئچه بانکین شوشه لرینی سیندیریب پوللارینی کوچه یه تؤکوب اودلاسایدیلار آنجاق آیدین او پولارا هئچ فیکیرده وئرمه میشدی .

آیدینین فیکری او قدر قاریشیق ایدی کی ، هئچ زامانین کئچمه سیندن خبری یوخ ایدی . آناسی نین سسی اونو اؤزونه گتیریب ساعاتی اونا آنلاتدی . یاتمالی ایدی . سحر تئز دوراجاقدی .

سحر اذانینین سسی آیدینی یوخودان اویاتدی . نئچه آیلار انتظارینی چکدییی گون آخیر کی گلیب چاتدی . یامان اضطرابلی ایدی . اما یوبانمادان آیاغا قالخیب دست ناماز آلیب پالتارلارینی اینینه گئیدی . آناسی و باجیسی هله یوخودایدیلار . آستاجا اونلارا یاخینلاشیب آناسینین اوزوندن اؤپدو . سونرا دا باجیسینین اوستون چکیب ، بالاجا بارماقلاری ایله اونون تئللرینی سیرغالادی . اوره یینده باجیسییلا نئچه کلمه دانیشدی : « باغیشلا ، سنی هله مدرسه یه یازدیرا بیلمه میشم . آما قوی بو آخشام تظاهرات دان قاییدیم هایاندان اولموش اولسا بیر بورج تاپارام . بلکه ده حاج میرسلیم منه یاردیم ائتدی . او درس اوخوماغی سئور ... » . گون آستا ـ آستا اؤزونو گؤستریردی . داها گئتمک واختی ایدی . باجیسینین آلنیندان اؤپوب آیاغا قالخدی . قاپینین آغزینا یئتیشنده بیر داها دا دالی یا دؤنوب آناسی و باجیسینا باختی . سونرا آستاجا قاپینی آچیب کوچه یه سوزولدو . بوروق ـ بوروق کوچه لردن اؤتوشوب اؤزونو بازار آغزینا چاتدیردی . بیر آز آختاراندان سونرا اؤز یولداشلارین بیر گوشه ده تاپدی . او یانا ساری گئدیب اونلارا قوشولدو . یاواش یاواش میلتین های ـ هارایی قالخیردی . آیدین دا اؤز یولداشلاری ایله میلته قوشولوب شعار وئره ـ وئره یولا دوشدولر . سربازلار هر زامان کی کیمی ماشینلارینین دالیسیندا سنگر توتوب مسلسللرین اوجونو میلته ساری دوتموشدولار .

ساعات 12 دن اویانا کئچمیشدی . بیر یاندان هاوانین ایستی سی او بیر یاندان دا اود وورولان تگرلرین توستوسو آدامی لاپ قیزیشدیریردی . آیدین برک یورولموشدو آما یئنه ده دورمادان شعار وئریب تگر اودلاییردی . بو گون بیر بانک دا اودلامیشدیلار . بوتون بازارین توکانلاری باغلی ایدی . خیاواندا هئچ بیر ماشین گل ـ گئت ائله میردی . گؤز ایشله دییی قدر آدام ایدی کی اللرینی یومروق ائدیب باغیرا ـ باغیرا شعار وئریردیلر . سربازلار او ساعاتا کیمی نئچه دفعه گؤیه گولـله آتیب میلتی قورخوتماق ایسته میشدیلر . آنجاق میلت دورمادان شعار وئریردی . داها هئچ کیم گولـله سسیندن قورخوب قاچمیردی . مسلسللرین سسی میلتی قورخوتماسایدی دا آنجاق بیر نئچه افسرین سربازلار آراسیندا اویان بویانا قاچیب اونلارین قولاغینا پیچیلدالاشمالاری بیر حادثه دن خبر وئریردی . او گون سحردن حاج میر سلیم ده اوردا ایدی . عباسینی چیخاردیب گنج لرله برابر میلتین قاباغیندا یئریییردی . تگر اودلامادا اونلارا یاردیم ائدیردی . بو آیدینا چوخ خوش گلیردی . اورکدن سئودییی کیشی ایندی اونونلا برابر تظاهراتدا وار ایدی و اونا یاردیم ائدیردی .

نظامی ماشینلار آستا ـ آستا میلته ساری گلمه یه باشلامیشدیلار و اونلارین دالیندا سنگر توتان سربازلاردا ماشینلارلا برابر قاباغا سورونودولر . بو مشکوک ایشلر حاج میر سلیمی داهادا آرتیق نگران ائدیردی . نهایت حاج میر سلیم له بیر نئچه آغ ساققال کیشی بیر یئره ییغیشیب نه ائده جکلرینی فیکیرلشمه یه باشلادیلار . اونلارین بیر یئره ییغیشماقلاریندان نئچه دقیقه اؤتوشمه میشدی کی بیردن گولـله یاغیشی میلتین اوستونه یاغماغا باشلادی . گولـله سسی ایله الله اکبر سسی بیر ـ بیرینه قاریشمیشدی . بازار آغزی قان آغلاییردی . آمبولانسلارین آژیری ، یارالانانلارین قیشقیرتیسی و ملتین شعار سسی گؤیلری درده سالمیشدی . بیر آنین ایچینده  یوزلر جاوان شهید اولدو . یارالی لار میلتین اللری اوستده آمبولانسلارا ساری آخیردیلار . آیدین بیر دووارین گوشه سینده اؤزونه یئر تاپیب اورا سیغینمیشدی اما حاج میر سلیم هله ده قاباقلاردا ایدی . تگرلردن قالخان قارا توستو هردن اونو آیدینین گؤزوندن آلیردی . آیدین یامان دیسکینمیشدی . بیلمیردی نه ائتمه لی دی . بیر دفعه ده یئل قارا توستولری آیدین لا حاج میر سلیمین آراسینی کسدی . همن آن نئچه گولـله نین آتیلماسی بیر کیشینین الله اکبر سسینه قاریشدی . اونون توتقون هابئله یانیقلی سسی آیدینین قولاغینا چوخ تانیش گلدی . بیر نئچه آندان قارا توستولر یاتاندان سونرا آیدین گؤزونون قاباغیندا گؤردویو منظره دن قورویوب بیر یئرده قالدی . حاج میر سلیم یئره دوشموشدو . یئرده آخان قان حاج میر سلیمین یارالانماسیندان حکایت ائدیر دی . آیدین لاپ گیجه لمیشدی . بیلمیردی نه ائله سین . بیر آز فیکیرلشدی . بونو چوخ یاخشی بیلیردی کی اگر یئریندن دورسا حتماً اونا ساری گولـله آتاجاقلار . آنجاق حاجی نی دا تک قویا بیلمیردی . بیر آن دا بوتون یاشادیقلاری گؤزونون قاباغیندان گلیب گئچدی . آتاسی ، آناسی ، باجیسی ، ایشله ین زامانلاری ، منبر باشیندا حاجی نین سؤزلرینه قولاق آسماسی و گونون باتماسی ...

باجی سینی مدرسه یه یازدیرمالی ایدی . ائولرینده چؤرکده قورتولموشدو . نئچه مدت ایدی ایش سیز قالمیشدی . مسلسللرین نریلتیسی اونو اؤزونه گتیردی . حاجی هله ییخیلدیغی یئرده قالمیشدی . بو صحنه یه دؤزمه ین غیرتلی آیدین بیردن آیاغا قالخیب حاج میر سلیمه ساری  یورومه یه باشلادی . هامی گؤردوکلرینه مات قالدیلار . بوتون سربازلارین مسلسللری اونا ساری باخسایدیلار دا آنجاق هئچ کیمین بارماغیندا ماشانی باسماغا گوج یوخ ایدی.آیدین اؤزونو حاجی یا چاتدیریب اونو یئریندن ترپتمک ایسته دی . هئچ کیم قورخوسوندان یاخینا گلنمیردی . آما آیدین دئیه سن بونلاری گؤرموردی . او یالنیز حاج میر سلیمی اورادان چیخارتماق ایسته ییردی . نه قدر گوجو وار ایدی ایشه سالدی کی حاجی نی دالیسینا آلسین . حاجی دانیشا بیلمیردی . هوشدان گئتمیشدی . ائله همن آن ایکی گولـله نین آتیلماسی بیر داها میلتی حئیرته سالدی . آیدین حاج میر سلیمین اوستونه دوشموشدو و اوره ییندن جوشان قان حاج میرسلیمین قانینا قاریشیب آسفالت اوسته سوزولمه یه باشلادی . اوزاقدان بیر افسر سئوینه ـ سئوینه اؤز یاراتدیغی منظره یه باخیردی ...

 ■

آیدینین آناسی چوخ نیگاران ایدی . گئجه 12 ایدی آما هله آیدین ائوه گلمه میشدی . باجیسی پنجره دالیسیندان اوزون کوچه لرینه گؤز تیکمیشدی . یای اولسایدی دا هاوا یامان توتقون ایدی . بیر سرین یئل آغاجلارین یارپاقلارینی اوینادیردی . گؤیده ایکی اولدوز پارلاییردی  و دامدا بیر گؤیرچین گون باتاندان گئجه یاریسینا قدر سس سیزجه اوتورموشدو ...

  

( تبریز ، بابک قوجازاده )

این داستان در نشریه سهیل (هفته نامه) - شماره ۱۳۸ به تاریخ ۲۱ بهمن ۸۷ به چاپ رسیده است

+ نوشته شده در  ساعت   توسط تیم مدیریت وبلاگ اسین  | 

 

سنی اونودار کن

گوز یاشلاریم گوزلریمی اونوتدو

 

مهدی خدایی(الیار)

+ نوشته شده در  ساعت   توسط تیم مدیریت وبلاگ اسین  |